Íslenska Byggingavettvangnum er ætlað að að efla innviði, auka samkeppnishæfni og efla samtal innan byggingageirans um hagsmunamál hans. Greina tækifæri til að auka framleiðni, auka skilvirkni, og nýsköpun. Þá er ætlunin að vettvangurinn stuðli að framþróun innan byggingageirans,  taki saman og miðli upplýsingum um geirann og stuðli að víðfermara framboði þjónustu, menntunar og þekkingar.

Lesa nánar

www.ils.is Framboð á húsnæðismarkaði að þorna upp

Framboð á húsnæðismarkaði að þorna upp

Skrifað þann 11.01.2017

Íbúðalánasjóður hefur samþykkt umsóknir um stofnframlög til uppbyggingar á 385 nýjum leiguheimilum í 11 sveitarfélögum. Alls nema stofnframlögin um 2 milljörðum króna. Þetta var kynnt á fundi hjá hagdeild Íbúðalánasjóðs fyrr í dag. Þar kom einnig fram að 20.000 einstaklingar á aldrinum 20-29 ára búa nú í foreldrahúsum, um 6.000 fleiri en fyrir 10 árum, og að skýr merki séu um að framboð eigna á húsnæðismarkaði sé óeðlilega lítið.

Á fundinum var m.a. fjallað um fyrstu úthlutun stofnframlaga, til byggingar og kaupa á leiguheimilum, á árinu 2016 og í kjölfarið fór Una Jónsdóttir, hagfræðingur í nýstofnaðri hagdeild Íbúðalánasjóðs, yfir íbúðamarkaðinn. Í hennar máli kom m.a. fram að 8 af hverjum 10 á aldrinum 25-34 ára verða fasteignareigendur þegar lánsmöguleikar og framboð eigna er gott en aðeins 6 af hverjum 10 í sama aldurshópi þegar lítið framboð er eins og nú. Þá sagði Una að gæðum opinberra gagna um leigumarkaðinn sé stórlega ábótavant. Aðeins um 50% leiguíbúða séu sýnileg en Íbúðalánasjóður stefni á að bæta verulega gagnavinnslu um húsnæðismarkaðinn og auðvelda almenningi á að átta sig á stöðunni.

Sigurður Jón Björnsson, framkvæmdastjóri fjárstýringar Íbúðalánasjóðs, fjallaði um þörfina fyrir nýtt húsnæði. Hann segir skýr merki vera um að framboð eigna á húsnæðismarkaði sé við það að þorna upp. Eignir seljist nú oft á sýningardegi sem sé óeðlilegt ástand. Sigurður segir að miðað við fjölda íbúða í landinu, og að 9-10% þeirra skipti um hendur á ári og 4 mánaða veltuhraða þá ættu 3.000 íbúðir að vera til sölu í dag en talan sé nær 1.000. Þetta geti verið merki um ofhitnun og að almenningur eigi að stíga varlega til jarðar.

Hér er hægt að nálgast erindin sem flutt voru.

Ávarp
Hermann Jónasson, forstjóri

Staðan á leigumarkaði
Una Jónsdóttir, hagfræðingur

Hagdeild og úthlutun stofnframlaga
Sigurður Jón Björnsson, framkvæmdastjóri fjárstýringarsviðs

Háskólagarðar HR
Þorkell Sigurlaugsson, framkvæmdastjóri



Nánar um leiguheimilin sem úthlutað var stofnframlögum til

Hvar á landinu munu íbúðir í fyrsta áfanga rísa?
Þau 385 leiguheimili sem Íbúðalánasjóður hefur samþykkt í fyrsta áfanga munu rísa í sveitarfélögunum Akranesi, Akureyri, Árborg, Hafnarfirði, Mosfellsbæ, Mýrdalshreppi, Reykjanesbæ, Reykjavík, Sandgerði, Sveitarfélaginu Hornafirði og Vestmannaeyjabæ.

Hvað eru stofnframlög til byggingar almennra íbúða?

Í haust samþykkti Alþingi lög um almennar íbúðir. Markmið þeirra er að bæta húsnæðisöryggi fjölskyldna og einstaklinga sem eru undir tekju- og eignamörkum við upphaf leigu, með því að stuðla að því að húsnæðiskostnaður sé í samræmi við greiðslugetu leigjenda.

Stofnframlög eru veitt til byggingar og kaupa á almennum íbúðum, svokölluðum Leiguheimilum, til að stuðla að því að í boði verði leiguíbúðir á viðráðanlegu verði fyrir þá sem þurfa á því að halda, þ.m.t. fyrir námsmenn, ungt fólk, aldraða og fatlaða. Stofnframlög ríkisins nema 18% af stofnvirði almennrar íbúðar.
Sérstök áhersla er lögð á nýbyggingar, fjölgun leiguíbúða og íbúðir á svæðum þar sem þörf er fyrir leiguíbúðir fyrir leigjendur undir tekju- og eignamörkum.

Hverjir geta sótt um stofnframlög?
Húsnæðissjálfseignarstofnanir, sveitarfélög og lögaðilar í eigu þeirra og lögaðilar sem störfuðu við gildistöku laga um almennar íbúðir og uppfylltu skilyrði til að fá lán.